uz
en
ru
O'zbekiston Respublikasi Fanlar akademiyasi Genetika va o'simliklar eksperimental biologiyasi instituti yetakchi ilmiy xodimi hamda O'zbekiston Fanlar akademiyasi akademigi, Genetika va o'simliklar eksperimental biologiyasi sohasida dunyoga tanilgan olim, O'zbekiston qishloq xo'jaligi rivojiga munosib hissa qo'shgan fidoyi inson, Abdumavlon Abdullaev 2022-yilning 8-dekabr kuni 92 yoshida vafot etdi.
A.A.Abdullaev 1961-yilda nomzodlik, 1972-yilda doktorlik dissertatsiyasini yoqlagan. 1979-yilda O'zR FAning muhbir a'zosi etib saylangan.
1980 yilda «O'zbekistonda xizmat ko'rsatgan fan arbobi» yuksak unvoni bilan taqdirlangan. 1984-yilda esa «Genetika» sohasi bo'yicha professor unvoni berilgan. 1995-yilda u «Molekulyar genetika» sohasi bo'yicha O'zR FA akademigi etib saylangan.
Akademik A.A.Abdullaevning asosiy ilmiy yo'nalishi g'o'za genetikasi, sistematikasi, evolyutsiyasi va filogeniyasi kabi fundamental muammolarini o'rganishga qaratilgan. Shu bilan birga, jahondagi eng boy kollektsiyalaridan biri — g'o'za genofondini yaratilishida, uni yangi namunalar bilan to'ldirishda A.A.Abdullaevning hissasi beqiyosdir.
A.A.Abdullaev to'plagan g'o'za genofondi kollektsiyasi respublikamizning milliy boyligi hisoblanib, kelgusida tadqiqotchilarning ko'p avlodlariga xizmat qiladi. Genofond foydali belgilar manbai bo'libgina qolmay, yangi genetik asosli istiqbolli navlar yaratish uchun muhim manba hisoblanadi. Yovvoyi tur va g'o'zaning yangi sintetik formalari qimmatli ho'jalik belgili donorlaridan nafaqat institut laboratoriyalarida, balki respublakamizning ko'pgina ilmiy tekshirish institutlarida ham samarali foydalaniladi. Ular asosida yangi navlar yaratilgan. A.A.Abdullaev An-Chillaki, AN Uzbekistan-3, AN-510, 512-516, Sharof-75, Besh-Qaxramon, Kleystogam, Hamkor, NASAF, Kupaysin, Genofond-2 va boshqa navlarga hammuallifdir.
A.A.Abdullaev rahbarligida tashkil etilgan g'o'za sistematikasi va filogeniyasi bo'yicha ilmiy maktab hozgirgi zamon talablari darajasida muvaffaqiyatli rivojlanmoqda. Ilmiy maktab nafaqat respublikamizda chet ellarda ham tan olingan.
O'zRFA Genetika va o'simlikalr eksperimental biologiyasi instituti jamoasi akademik A.Abdullaevning oila a'zolariga, yaqinlariga va shogirdlariga chuqur ta'ziya izhor etadi.